„Парамаунт“ денеска даде контрапонуда за преземање на „Ворнер Брос Дискавери“ во вредност од 108,4 милијарди долари, започнувајќи потенцијално жестока битка со „Нетфликс“ за компанијата што стои зад „Ејч-Би-О“, „Си-Ен-Ен“ и „Ди-Си Студиос“, како и правото да го преобликува поголемиот дел од пејзажот на индустријата за забава во земјата.
Ова следи само неколку дена откако „Нетфликс“ постигна договор од 72 милијарди долари за преземање на „Ворнер Брос“, а обидот за преземање значи дека „Парамаунт“ ќе оди директно кај акционерите на „Ворнер“ со понуда вредна околу 74,4 милијарди долари, или 30 долари по акција во готово. За разлика од „Нетфликс“, „Парамаунт“ нуди да ги купи и средствата за кабелска телевизија на „Ворнер Брос“. Раководителите на „Парамаунт“ рекоа дека нивната понуда вреди околу 18 милијарди долари повеќе од конкурентската понуда од „Нетфликс“, за која рекоа дека се базира на „илузорна проспективна проценка“ на имотот за кабелска телевизија.
Тоа е истата понуда што „Ворнер Брадерс“ претходно ја отфрли во корист на понудата од „Нетфликс“.
„Парамаунт“ тврдеше дека нивната понуда од 30 долари по акција во готовина за целиот „Ворнер Брадерс Дискавери“ е супериорна во однос на понудата на „Нетфликс“, обезбедувајќи им на акционерите 18 милијарди долари повеќе во кеш и полесен пат до регулаторно одобрување. Исто така, тврдеше дека спојувањето на „Парамаунт“ и „Ворнер Брадерс“ би било во најдобар интерес на креативната заедница, кината и потрошувачите, кои би имале корист од зголемената конкуренција.
„Веруваме дека нашата понуда ќе создаде посилен Холивуд“, изјави извршниот директор на „Парамаунт“, Дејвид Елисон.
Сепак, аналитичарите забележаа дека понудата на „Парамаунт“ има свои ризици, вклучително и дополнителен долг потребен за да успее трансакцијата.
