Плажата Елафониси на грчкиот остров Крит е прогласена за најдобра плажа во Европа според изборот на патниците на платформата Tripadvisor, освојувајќи ја престижната награда „Избор на патници“ за оваа година. Позната по својот препознатлив розов песок и кристално чистото тиркизно море, оваа дестинација доби најголем број оценки со највисока оценка „извонредно“ меѓу европските плажи.
Иако европските крајбрежја нудат голема разновидност – од дивите и карпести брегови на Ирска до долгите песочни плажи во Шпанија – Елафониси со години останува меѓу највисоко рангираните туристички локации, привлекувајќи посетители од целиот свет.
Сместена на југозападниот дел од Крит, плажата е позната по својот уникатен природен пејзаж. Розовата боја на песокот е резултат на ситно здробени школки и црвеникави микроорганизми од морските живеалишта, кои со морските струи се мешаат со белиот песок и создаваат впечатлив визуелен ефект.
Посетителите најчесто ја избираат Елафониси заради плитките и мирни води, а особено атрактивна е за време на осека, кога се појавува природна песочна врска што го поврзува Крит со малото островче Елафониси. Тогаш туристите можат пеш да стигнат до островчето низ плитка вода, откривајќи скриени заливи и мирни делови од брегот.
Поради големата популарност, туристичките водичи препорачуваат плажата да се посети надвор од главната летна сезона, кога гужвите се помали и природната убавина може целосно да се доживее.
Интересно е што во 2025 година Елафониси беше прогласена и за најдобра плажа во светот, додека оваа година глобалната титула ја понесе плажата Исла Пасион во Мексико. Сепак, Крит продолжува да доминира на европската туристичка сцена, со дури три плажи меѓу десетте најдобри во Европа за 2026 година.
Топ 10 плажи во Европа според Tripadvisor:
- Елафониси, Крит – Грција
- Лагуната Балос, Крит – Грција
- Праја да Фалесија, Олхос де Агуа – Португалија
- Ла Пелоса, Сардинија – Италија
- Фаласарна, Крит – Грција
- Платја де Муро, Мајорка – Шпанија
- Палеокастрица, Крф – Грција
- Spiaggia dei Conigli, Лампедуза – Италија
- Плаја де Маспаломас, Гран Канарија – Шпанија
- Плаж де Паломбаџа, Порто-Векио – Франција
