Почетокот на денешниот натпреварувачки ден во Лигата на шампионите донесе две убедливи победи и нов бран европски амбиции. Во Истанбул, Виктор Осимен повторно беше јунак во дресот на Галатасарај, кој го совлада норвешкиот шампион и дебитант Бодо/Глимт со 3:1. На „Сан Мамес“, пак, Атлетик Билбао направи пресврт и со истиот резултат го победи азербејџанскиот Карабах, освојувајќи ги првите бодови во тековната сезона во најелитното европско натпреварување.
Нигерискиот напаѓач Виктор Осимен повторно беше во центарот на вниманието во дресот на Галатасарај. Со два гола во првото полувреме, тој ја предводеше турската екипа до важна победа што ги зацврсти позициите на тимот во групната фаза. Веќе во третата минута од натпреварот, Осимен ја казни одбраната на Бодо/Глимт по одлична асистенција од Марио Лемина. Во 33-та минута следуваше и втората негова мајсторија, кога ја искористи грешката на Фредрик Андре Бјоркан, го заобиколи голманот Хаикин и погоди за 2:0.
Во второто полувреме, Галатасарај целосно го контролираше темпото на игра. Јунус Акѓун го зголеми водството на 3:0 по уште една акција што ја започна Осимен со пресинг и одземена топка. Гостите од Норвешка успеаја да постигнат почесен гол преку Андреас Хелмерсен во 81-та минута, но тоа не ја смени сликата на теренот. Галатасарај стигна до втората европска победа во низа и сега има шест бодови по три одиграни натпревари.
Осимен со овие два погодоци стигна до три гола во тековната сезона во Лигата на шампионите, а вкупно пет во сите натпреварувања. Публиката на „Рамс Парк“ му оддаде овации за уште едно доминантно издание, во кое покажа зошто е новото лице и лидер на турскиот шампион.
Во Билбао, Атлетик конечно ја запиша првата победа во овогодинешната Лига на шампионите, совладувајќи го Карабах со 3:1. Почетокот не ветуваше многу, бидејќи само по една минута Ландро Андраде го искористи недоразбирањето меѓу Лапорт и Паредес и донесе рано водство за гостите.
Сепак, домашниот тим на Ернесто Валверде реагираше зрело и агресивно. По неколку промашени прилики, Гурузета во финишот на првото полувреме ја врати рамнотежата со прецизен удар. Во вториот дел, притисокот на Баскијците донесе резултат кога резервистот Роберт Наваро со феноменален удар во 74-та минута ја сврте средбата, а Гурузета со втор гол, со волеј од надвор од шеснаесетникот, ја запечати победата.
Особено внимание привлече враќањето на Нико Вилијамс, кој по повредата повторно се врати во редовите на Атлетик за деби во европски натпревар од Лигата на шампионите. Со својата брзина и продорност тој создаде неколку опасни ситуации и даде нов импулс во нападот на Атлетик.
Со оваа победа, Атлетик се искачи во средината на табелата во групната фаза, враќајќи ги надежите за пласман во нокаут рундата. Карабах, пак, и покрај првиот пораз сезонава, останува во добра позиција по двете претходни победи.
