Со спортски активности и пораки за здрава и активна иднина, викендов беше затворена Европската недела на спортот 2024, а воедно и свечено отворена спортската сезона за 2025 година. Настанот се одржа во организација на Министерството за спорт, предводено од министерот Борко Ристовски, и привлече бројни граѓани, млади спортисти, институции и јавни личности.
Настанот е дел од иницијативата на Европската комисија за поттикнување физичка активност и рекреација кај сите возрасни групи, со посебен фокус на младите.
Присутни беа и градоначалниците на неколку општини, меѓу кои и Орце Ѓорѓиевски од Кисела Вода и Дејан Митески од Аеродром, кои во изјава за медиумите ја истакнаа важноста од вложувања во спортот на локално ниво.
„Спортот не е само физичка активност – тој е вредносна платформа за градење на здрави навики, дисциплина и самодоверба кај младите. Наша обврска е да создадеме услови секое дете да има можност за спорт и рекреација“, изјави Орце Ѓорѓиевски.
Дејан Митески додаде дека Општина Аеродром останува посветена на поддршка на спортот: „Во нашата општина активно работиме на нови спортски терени, инвестиции во школски спорт и поддршка на младински клубови. Спортот е директна инвестиција во здравјето и иднината на нашите деца.“
Меѓу присутните беа и претставници од дипломатскиот кор, амбасадори, како и заменик-министерот за труд, демографија и млади, Ѓоко Велковски. Заедничката порака од сите беше јасна – спортот обединува, инспирира и гради посилни заедници.
Настанот заврши со спортски демонстрации, игри и дружење со граѓаните, испраќајќи силна порака за важноста од активен и здрав начин на живот.
