Кандидатот за градоначалник на Град Скопје, Орце Ѓеорѓиевски, престојува во Љубљана заедно со својот тим, каде оствари средби и посети институции што се пример за успешен урбан модел.
На средбата со долгогодишниот градоначалник на Љубљана, Зоран Јанковиќ, било разговарано за конкретни чекори во насока на обновата на Скопје. Ѓеорѓиевски ја искористил посетата за да стекне искуства и идеи кои може да се применат во македонската метропола.
Посебен акцент ставил на јавниот превоз и јавната чистота – два од најголемите предизвици за Скопје. Од менаџментот на претпријатието за јавен превоз во Љубљана, тој добил ветување за испраќање експертски тимови кои ќе помогнат во надминување на проблемите со транспортот во главниот град.
Исто така, кандидатот за градоначалник ја посети современата фабрика за преработка на комунален отпад, која обработува отпад од 46 општини во Словенија, со проект реализиран со поддршка на Европската унија. Оттаму, добил ветување за поддршка и во решавањето на проблемите со јавната чистота во Скопје.
„Љубљана е доказ дека со јасна визија, ред и посветеност може да се создаде град кој е чист, достоинствен и пријатен за живот. Се враќаме со нови идеи, искуства и силна мотивација – да го направиме и нашето Скопје град со кој ќе се гордееме“, порача Ѓеорѓиевски.
