Огромна зимска бура ја парализира Америка. Од Тексас на запад па се до источните држави. Повеќе од 500 илјади домаќинства се без електрична енергија, а авиосообраќајот е во колапс.Откажани се над 9.600 летови.
Претседателот Доналд Трамп одобри прогласување на федерална вонредна состојба за Јужна Каролина, Вирџинија, Тенеси, Џорџија, Северна Каролина, Мериленд, Арканзас, Кентаки, Луизијана, Мисисипи, Индијана и Западна Вирџинија.
„Ќе продолжиме да ги следиме и да останеме во контакт со сите држави на патот на оваа бура. Останете безбедни“, напиша Трамп на својот профил на Truth Social.
Прекините на струја се шират со огромна брзина. Најкритична е состојбата во Мисисипи, Тексас и Тенеси, каде повеќе од 100.000 корисници се во мрак.
За да се спречи целосен колапс на мрежата, Министерството за енергетика издаде итни наредби со кои се овластуваат операторите во Тексас и средноатлантскиот регион (PJM Interconnection) да користат сите расположливи резервни ресурси, игнорирајќи ги привремено еколошките ограничувања за да се спаси електроенергетскиот систем.
