Секој продолжен викенд, празник или летен одмор илјадници граѓани од Македонија се упатуваат кон плажите и продавниците во соседна Грција. Но од 13 септември 2025 година, сите возачи – и домашни, и странски – вклучително и туристите од Македонија, ќе се соочат со најстрогиот сообраќаен закон што досега го донела грчката влада.
Новите регулативи имаат за цел да го намалат ризичното однесување на патиштата, особено фокусот е ставен на користењето мобилен телефон додека се управува со возило – навика која, според грчките власти, сè почесто води до тешки и фатални сообраќајни несреќи.
Ако досега последиците за ваков прекршок се сведуваа на казна и двомесечно одземање на возачката дозвола, од септември натаму следуваат драстично повисоки санкции:
- Прв прекршок: 350 евра казна и одземање на возачката дозвола на 1 месец.
- Втор прекршок: 1.000 евра и шестмесечна забрана за управување со возило.
- Трет прекршок: 2.000 евра казна и забрана за возење во траење од една година.
- Ако употребата на мобилен доведе до сообраќајна несреќа, казната се искачува на 4.000 евра, а возачката може да биде одземена до 8 години.
- Во случај на сериозни повреди или смрт: предвидени се затворски казни – 10 години за тешка телесна повреда, до 20 години за смрт, а во случај на повеќе жртви, доживотна казна затвор.
Законот се однесува и на странски државјани, без исклучок, што значи дека македонските туристи мора да бидат крајно внимателни. Дури и најмала употреба на мобилен телефон – како проверка на порака или повик без хендсфри – може да биде санкционирана.
Иако некои од новите правила беа најавени во дел од медиумите, многумина туристи остануваат неинформирани сè до моментот кога ќе бидат сопрени од страна на грчката полиција. Според информациите, полицијата има право веднаш да го задржи возилото и документите на возачот доколку утврди прекршок.
Се поставува прашањето дали македонските граѓани, кои често патуваат кон Халкидики, Солун, Кавала и другите атрактивни дестинации, се доволно информирани за новите ригорозни мерки.
Надлежните институции апелираат до граѓаните да се информираат навреме, да го почитуваат новиот сообраќаен режим и целосно да се воздржат од користење телефон додека возат во Грција, бидејќи незнаењето нема да биде основ за поблаги последици.
