Апелациониот суд во Ниш наложи дополнување на истрагата во постапката за повторно одлучување во случајот со исчезнувањето и смртта на двегодишната Данка Илиќ, оценувајќи дека е потребно дополнително да се разјаснат околностите и да се провери валидноста на собраните докази, вклучително и одбраната на сообвинетите.
Според официјалното соопштение, новиот судски совет, со променет состав, ќе има обврска да спроведе реконструкција на настанот под идентични услови со цел попрецизно да се утврди фактичката состојба, но и повторно да се испита мајката на Данка, Ивана Илиќ.
„Реконструкцијата на настанот мора да се изврши според исказот на секој поединечен обвинет, особено според исказот на мајката Ивана Илиќ, која мора повторно да биде сослушана како сведок – сè под исти метеоролошки услови, во исто време од денот и со идентичен распоред на зградите и паркираното возило во дворот на куќата во населбата Бањско Поље, како и положбата на службените возила на блиската улица“, се наведува во образложението.
Контрадикции во обвиненијата против Драгиевиќ
Реконструкцијата ќе се базира на досега собраните докази, вклучувајќи извештаи од местото на злосторството, скици од местото на настанот, фотографии и стручни мислења.
Апелациониот суд истакнува дека описот на кривичното дело во однос на обвинетиот Радослав Драгиевиќ содржи внатрешни противречности и е правно неодржлив.
„Се тврди дека Драгиевиќ е основано осомничен дека му помагал на Срѓан Јанковиќ, соизвршителот на тешкото убиство, иако е опишано и како Дејан Драгиевиќ го убил детето, го донел телото дома и, со знаење на таткото, обвинетиот Радослав, повторно го преместил во напуштена куќа. Подоцна, самиот Радослав го преместил телото повторно на друга, непозната локација“, се наведува во одлуката.
Со оглед на императивните одредби од Кривичниот законик, судот мора да утврди дали постои основа за обвинението против Радослав Драгиевиќ, бидејќи според законот, лице кое му помага на крвен роднина по извршувањето на кривично дело или не го пријави тоа не е казниво.
Упатства за донесување нова одлука
Судот, исто така, наложи новиот совет да:
јасно, доволно и правилно објасни постоењето на основано сомневање во врска со фактите што ги сочинуваат елементите на кривичното дело
да ги наведе конкретните докази од кои произлегуваат овие факти
да ги оцени наводите во одговорот на обвинителниот акт.
„По постапувањето по овие приговори, првостепениот суд треба, врз основа на квантитативна (не квалитативна) проценка на доказите, да донесе правилна и правно заснована одлука“, се наведува во заклучокот на Апелациониот суд.
Можност за префрлање на предметот во Неготин
Според „Блиц“, ова значи дека судиите кои претходно биле вклучени во предметот (на пр. при одредување притвор, испитување на обвинението или негово продолжување) не можат да учествуваат во донесувањето на новата одлука. Поради ова, Вишиот суд во Зајечар побарал назначување на нов совет, а Апелациониот суд во Ниш предложил предметот да се префрли на најблискиот повисок суд во регионот – Вишиот суд во Неготин.
