Државниот трудов инспекторат ќе поднесе кривични пријави против две фирми по трагедијата во која животот го загуби 28-годишниот охриѓанец Кристијан Љушев, откако инспекциската контрола утврдила сериозни прекршувања на прописите за безбедност и здравје при работа.
По двонеделна контрола на градилиштето, инспекторите констатирале дека компаниите не ги почитувале законските обврски, што директно придонело за несреќата со фатални последици.
Трагедијата се случила кога младиот работник, вработен во фирма за ентериери, пренесувал мебел во зграда во изградба. При тоа, тој паднал во незаштитен и неограден отвор за лифт, по што им подлегнал на повредите.
Поради утврдените неправилности, Трудовиот инспекторат донел времена забрана за работа на целиот објект, која ги опфаќа инвеститорот, изведувачот и надзорот.
За опасните услови на градилиштето сведочи и таткото на починатиот, Валентин Љушев, кој јавно изјави дека само неколку дена пред несреќата забележал дека отворите за лифтови се оставени без никаква заштита. Тој побара целосна одговорност од сите инволвирани страни.
Имињата на фирмите засега не се објавуваат, како што велат надлежните, во интерес на истрагата. По комплетирање на целокупната документација, предметот ќе биде доставен до Јавното обвинителство, кое ќе одлучува за понатамошните чекори.
