Интересот за електрични возила нагло порасна низ цела Европа од почетокот на конфликтот во Иран, бидејќи зголемените цени на горивата ги натераа купувачите да се свртат кон поевтина енергија од електричната мрежа.
Онлајн платформите за продажба на автомобили во Велика Британија, Германија, Франција и Шпанија бележат значителен скок во пребарувањата за електрични возила уште од почетокот на кризата, пишува The Guardian.
Конфликтот, кој започна на 28 февруари, предизвика нагло поскапување на бензинот и протести во повеќе земји. Дополнително, затворањето на Ормускиот теснец – клучна рута за транспорт на нафта и гас – создаде сериозни нарушувања на глобалните пазари.
За разлика од горивата, цените на електричната енергија останаа релативно постабилни, што дополнително ја зголеми атрактивноста на електричните автомобили.
Скок на побарувачката до 50%
Од германската платформа Mobile.de наведуваат дека високите цени на горивата биле „катализатор“ за раст на интересот за електрични автомобили. Во март е забележан пораст од над 50% во пребарувањата во однос на февруари.
Истовремено опаѓа интересот за бензински и дизел возила, додека хибридите бележат умерен раст од околу 4%.
Најбараниот модел на струја е Volkswagen ID.3, а дополнителен поттик даваат и државните субвенции од околу 6.000 евра во некои земји.
Цената на дизелот, која достигна околу 2,50 евра за литар, дополнително ги мотивира потрошувачите да преминат кон возила со нула емисии.
Двопроцентен премин кон нова реалност
Платформата Carwow бележи раст на интересот за електрични возила меѓу 20 и 30% на повеќе европски пазари, додека во Велика Британија порастот изнесува 23%, а за хибридни автомобили 19%.
Во Франција, платформата La Centrale забележала дури 160% пораст на пребарувања за електрични автомобили, додека AutoScout24 известува за раст од околу 40% во Германија, Австрија и Италија.
Иако експертите предупредуваат дека ваквиот скок може делумно да се стабилизира со текот на времето, тие сметаат дека интересот за електрични возила нема да се врати на старите нивоа.
Причината е промена во свеста кај потрошувачите – сè повеќе луѓе го гледаат вкупниот трошок на сопственост, а не само почетната цена на автомобилот.
Како што наведуваат аналитичарите, кризата со горивата го забрзала процесот што класичната енергетска транзиција во Европа досега не успеала целосно да го постигне.
