Здравствениот дом од Крива Паланка набави две нови, комплетно опремени, санитетски возила за итната медицинска помош, информира Јоско Стефановски, вршител на должноста директор на здравствен дом „Димитар Арсов”, Крива Паланка.
Набавката е извршена со сопствени средства од буџетот на здравствената установа.
– Набавката на возилата е само почеток на планот за комплетно обновување на целокупниот возен парк на итната медицинска помош и ќе значи директно засилување на институцијата во контекст на пружање брза и квалитетна, навремена услуга за граѓаните. За периодот што следува, наредните години се планира набавка на уште 4-5 возила за целосна обнова на возниот парк на итната помош, рече Стефановски.
Претходно, со обезбедена согласност од Министерството за здравство беа вратени тројца возачи во здравствениот дом, а пред околу два месеца беа одобрени и веќе се реализираат четири многу значајни специјализации за надополнување на специјалистички кадар во домот: интерна медицина, дермато-венерологија, хирургија и неврологија.
-Тековно, интензивно се работи на подготовка за активирање на направениот ургентен центар, се работи на обезбедување неопходни пристапни елементи, инфраструктура и техничко -оперативни зафати, додаде Стефановски.
Истакна дека редовно се работи и на обнова на техничка опрема за непречено секојдневно работење на установата.
