Австралиското момче Нико Антиќ, 12 години, почина во болница откако беше каснато од ајкула во пристаништето во Сиднеј, соопшти денес неговото семејство.
Ајкулата го нападнала момчето во неделата додека скокало од карпа со пријатели во Воклис, околу девет километри од централниот деловен округ во Сиднеј, објави Ројтерс.
Неговите пријатели го извлекле од водата и го однеле во болница со сериозни повреди на двете нозе. Десетици плажи, вклучувајќи ги и оние во Сиднеј, беа затворени оваа недела по четири напади од ајкули за два дена.
Во септември, еден сурфер беше убиен од ајкула на плажата Лонг Риф во Сиднеј.
Според групите за заштита на природата, во Австралија се случуваат просечно 20 напади од ајкули годишно, од кои три се фатални.
