Почитувани браќа и сестри, 1080 на број, колку што има функционери и колку што сме денеска, ви благодарам за поддршката. Следниот пат ќе бидеме 3000, а потоа 30.000! — рече првиот човек на ССМ, Слободан Трендафилов, на денешниот протест со цел зголемување на минималната плата на ниво од 500 евра.
Трендафилов најави дека повторно ќе ги повика работниците, но и политичките партии, да не добиваат политички поени и сите заедно да застанат зад изгласување на поголеми плати и достоинствени услови за работа.
Протестот започна од Работничкиот дом, продолжи пред Собранието и Стопанската комора и заврши пред Владата. На јавната седница на Собранието на ССМ, едногласно беше донесена одлука целата Влада и сите функционери да бидат на минимална плата.
„ССМ и органите и телата ви донесоа одлука сите вие на минималец. Доколку не ја почитувате, можен е генерален штрајк. Ако не ги зголемите платите на работниците, ќе следат нови протести!“ — порача Трендафилов.
Тој ја повика Владата да ја тргне поддршката од партиските синдикати кои спречуваат протести и да ги слушне гласовите на граѓаните. Истакна дека протестот не е за рушење на Владата, туку за притисок за зголемување на платите и подобри работнички права.
На почетокот на протестот, пред Работничкиот дом, работниците со едноминутно молчење им одадоа почит на трагично загинатите во Кочани.
Работниците заслужуваат достоинство и правда!
