Заменик-директорот на ЈП „Македонски шуми“, Кире Михаилов, информираше дека денеска во скопскиот регион се одземени четири моторни возила натоварени со бесправно посечени огревни дрва, без жиг и со непостоечка документација.
„На планината Китка беа фатени три возила со нелегално исечени дрва. Иако е празничен ден, институциите, особено Министерството за внатрешни работи, беа на висина на задачата“, напиша Михаилов.
Покрај дрвокрадците, денот го одбележаа и бројни пожари. Според него, на територијата на Македонија се регистрирани 27 пожари, од кои повеќе прераснале во големи и опасни. Најкритичен е пожарот кај селото Церово во општина Желино, кој се шири кон Карпалак и кон територијата на Скопје.
Пожар се случи и во Гостивар, кој експресно беше ставен под контрола, додека активни пожари има и во општините Дебарца, Врапчиште, Могила и Прилеп.
„Службите се на терен и остануваме посветени на надминување на сите предизвици со кои се соочуваме“, порача Михаилов.
