Претседателот на Владата, Христијан Мицкоски на денешната собраниска седница за пратенички прашања ги повика обвинителството и надлежните органи да истражат дали политичката партија Левица и нивниот лидер Апасиев сториле кривично дело со купување на деловен простор во центарот на Скопје по пониска цена од таа која била пресметана од Град Скопје.
„Кога станува збор околу кривичните дела би сакал Апасиев да го прашам дали му е познат овој објект во центарот на Скопје. Во овој објект има еден договор за продажба на недвижен имот на политичката партија Левица. Политичката партија Левица со овој договор на 26.11.2024 година купила деловен имот од 409 метри квадратни на Адвокатската улица, верувале или не за цена од 295.000 евра со ДДВ или просечно квадратот на овој објект во центарот на Скопје е 721 евро согласно овој договор. За какво кривично дело ова е професоре? Зошто е кривично дело, затоа што Градот Скопје им пресметал дека ова кривично дело, е еднакво на цена квадрат 1.150 евра, па сте платиле данок во вредност од 739.285 денари. Ова кривично дело, со ќе се позанимаваат органите е преку Универзална инвестициона банка”, изјави премиерот Мицкоски.
Премиерот Мицкоски посочи дека тој објект, истата банка имаат заедничко и со Соравиа каде извршителот Андреја Бунески е заеднички извршител и за едниот објект и за другиот објект, па се поставува прашање дали Левица се заинтересирани и за Соравиа.
„Имајќи предвид дека за Соравиа не успеа бизнисот е закажана извршителска продажба, јавно наддавање на 24 април и истата е проценета за 24 април и истата е проценета за 22,4 милиони евра, па се поставува прашањето дали како што Левица го купи едниот деловен објект, пошто гледаме колку се неподмитливи, ќе наддава и за тие 22,4 милиони евра? Ја користам оваа прилика да се обратам до органите и до министерот за внатрешни работи и до Финансиската полиција и сите останати да проверат дали има основа за кривично дело, дали политичката партија Левица потпишувајќи го овој договор за купопродажба сторила кривично дело, така што го купила тој простор по цена од 721 евро за метар квадратен, простор кој вреди најмалку три пати повеќе од тоа што Левица го купила, а од друга страна град Скопје вели дека повеќе вреди, а потписник на договорот е Апасиев, професор на правниот факултет при Универзитет во Штип”, истакна премиерот Мицкоки.
Премиерот Мицкоски потенцираше дека кога станува збор за кривични дека треба обвинителството и органите на истрага длабински да истражат што е тоа кое што претставува кривично дело, а што е тоа што не претставува.
„Но, она кое што јас може да кажам е дека со криминалот и криминалците нема играње, вклучително и тие кои се потенцијални криминалци и за тие за кои постои основано сомнение и тие кои имаат судска правосилна пресуда дека сториле криминал без разлика од која политичка партија доаѓаат, дали се од СДСМ, ДУИ, дали се од Левица, ВМРО-ДПМНЕ или друга, кога станува збор за кривичните дела и последниот бастион во одбрана на поранешните високи функционери од поранешната власт вие сте тука незаменлив партнер”, рече премиерот Мицкоски обраќајќи се кон пратеникот Апасиев порачувајќи дека поранешните функционери од СДСМ и ДУИ сами не се бранат, колку што Апасиев ги брани.
