Осомничениот за масакрот во Цетиње, Ацо Мартиновиќ, изврши самоубиство откако уби најмалку дванаесет лица, соопшти полицијата.
Мартиновиќ, кој бил во бегство, бил лоциран од страна на полицијата во близина на својот дом во Цетиње. „Откако полицијата го опколи и кога сфати дека нема излез, се застрела и почина за време на транспортот до клиничкиот центар,“ изјави на прес-конференција директорот на полицијата Лазар Шќепановиќ.
Според Шќепановиќ, напаѓачот убил најмалку дванаесет лица, но се истражува можноста за уште жртви. Четири лица се тешко повредени. Трагедијата добива уште подраматичен тек со фактот дека меѓу загинатите има две деца на возраст од 10 и 13 години, а повеќето од жртвите биле пријатели, кумови и роднини на убиецот.
Според досегашните информации, Мартиновиќ започнал со злосторството во ресторан во Велестово, во близина на Спортскиот центар. По вербална расправија со гостин, се вратил дома, зел пиштол и се вратил во ресторанот, каде што убил четири лица.
Потоа, на три различни локации, ги убил членовите на своето семејство и две деца. Полицијата продолжува со истрагата за целосно расветлување на овој трагичен настан.
