Најновиот iPhone 17 Pro со 256GB меморија веќе е достапен и за македонските потрошувачи, но по цена што е значително повисока од официјалната. Додека во САД истиот модел чини 1.099 долари (околу 935 евра), во Македонија неговата цена изнесува дури 93.990 денари, односно околу 1.530 евра.
Оваа разлика од речиси 500 евра уште еднаш го става во фокус прашањето – зошто најновите уреди на Apple во Македонија се продаваат по една од највисоките цени во регионот.
Иако разликата во цената е голема, побарувачката за најновите модели на iPhone останува стабилна. Секое ново издание предизвикува интерес кај домашните љубители на технологијата, кои често се подготвени да платат повеќе за да бидат меѓу првите што ќе го имаат уредот.
Од друга страна, расте и бројот на граѓани кои телефонот го набавуваат преку онлајн продавници или преку пријатели од странство, каде што цената е далеку поповолна. Со ова, дел од македонските потрошувачи практично го заобиколуваат локалниот пазар, кој сè повеќе важи за еден од најскапите во регионот кога станува збор за Apple производи.
Парадоксот останува – додека во земји со повисок животен стандард iPhone чини помалку, во Македонија и покрај пониските просечни примања, новите модели на „јаболкото“ се луксуз кој чини значително повеќе.
