Кремљ денес соопшти дека Русија е длабоко загрижена за можноста САД да ја снабдат Украина со ракети „Томахавк“, предупредувајќи дека војната достигнала драматичен момент, со ескалација на тензиите од сите страни.
Американскиот претседател Доналд Трамп изјави во понеделник дека пред да се согласи да обезбеди ракети „Томахавк“, би сакал да знае што планира да прави Украина со нив, бидејќи не сака дополнително да ја ескалира војната меѓу Русија и Украина.
Сепак, тој додаде дека „на некој начин, тој веќе донел одлука“ за ова прашање. Ракетите „Томахавк“ имаат дострел од околу 2.500 километри, што значи дека Украина би можела да ги користи за удари длабоко во Русија, вклучително и во Москва. Според извештајот на американската Конгресна истражувачка служба, некои варијанти на „Томахавк“ можат да носат и нуклеарни боеви глави.
Портпаролот на Кремљ, Дмитриј Песков, денес изјави дека оваа тема е многу загрижувачка.
„Сега е навистина многу драматичен момент, со оглед на тоа што тензиите растат од сите страни“, рече тој.
Војната во Украина, најсмртоносната во Европа од Втората светска војна, предизвика најголема конфронтација меѓу Русија и Западот од Кубанската ракетна криза во 1962 година, а руските претставници велат дека сега се заглавени во горчлив спор со Западот.
