На денешното судење за убиствата на Вања и Панче сведочеше еден од обвинетите Влатко Кешишев, кој одговараше најпрво на прашања на својот адвокат, а потоа и на прашања на обвинителството.
Кешишев рече дека му бил послушен на Палчо. Тој во својот исказ кажа дека никогаш не се зборувало за убиства, туку само за грабнување. Рече дека не знаел дека Панче бил убиен, и дека не знаел за Вања, иако видел како Палчо држи пиштол и пука. За Вања, вели, дознал кога се вратиле во партија и кога отворил социјални мрежи кога видел дека се трага по девојче од таа зграда, но Палчо ништо не му одговорил.
Кешишев рече дека во неговиот мобилен телефон, Палчо му бил мемориран како „Царот“.
Обвинителство: На 22.11.2023 година кога одите кај местото викано Рудник не го носите вашиот мобилен телефон, така?
Кешишев: Да. Го оставив во штабот.
Обвинителство: Логично ли беше ако не одите да убивате некого да го оставите вашиот телефон во Скопје, за да не се открие вашето движење и комуникацијата?
Кешишев: Никогаш не отидовме да убиваме. Никогаш не се правеа планови за тоа. Се зборуваше само за грабнување. Ми рекоа да го оставам телефонот во штабот, бидејќи имаме мотороли. Никогаш не правевме муабет за убиства. Не пријавив никаде дека се случи убиство. Прво бев збунет, а после не можев да го напуштам штабот.
Обвинителство: Во вашиот мобилен телефон кој сте го користеле, Палчо ви е мемориран како „Царот“. Тоа значи дека слушате се што ќе ви каже и нареди Палчо?
Кешишев: Да!
Обвинителство: Од изготвеното психијатриско вештачење од вешто лице, дадено е мислење дека вие сте психички здрава личност со уредна интелигенција, можам да заклучам дека свесно и доброволно сте ги преземале сите дејствија, така?
Кешишев: Не баш свесно, по навика му бев послушен оти ми кажа да седам на страна.
