Поранешниот претседател на Турската демократска партија (ТДП), Кенан Хасипи, остро реагираше на изјавите на актуелниот пратеник Сали Мурати, алудирајќи дека неговото политичко делување е „празно, агресивно и без суштински резултати“ за турското општество во државата.
Во долг статус на Фејсбук, Хасипи го обвини Мурати дека со години создава лажна слика за својата улога и придонес, додека, како што наведува, ги потценува децениските напори на ТДП.
Хасипи истакна дека Мурати „многу зборува, но малку работи“, нагласувајќи дека неговата политика се темели на „бомбардирање со измени на закони, дополнителни прописи и жалби, кои немаат реална корист за општеството“.
Тој потсети дека токму благодарение на поддршката на ТДП, Мурати бил поставен на бројни високи позиции меѓу кои кандидат за градоначалник на Врапчиште, член на Државната пописна комисија и член на Уставниот суд на Република Македонија додавајќи дека денес Мурати се претставува како сопствено достигнување.
„Овој господин, познат како ‘шоумен политичар’, ја манипулира јавноста, ги искривува фактите и се обидува да остави впечаток дека историјата започнала со него“, пишува Хасипи.
Хасипи упати и лична критика кон своите претходни одлуки.
„Грешев што овој човек повеќепати го предлагав и го поддржував за важни државни позиции. Јавно ја прифаќам таа грешка“, напиша тој.
Во продолжение, Хасипи го обвини Мурати за манипулации, евтина пропаганда и обиди да се избрише улогата на ТДП во обезбедувањето права, институционална застапеност и општествена видливост на Турците во Северна Македонија. Според него, Мурати се обидува да се прикаже како единствениот „херој“ на заедницата, додека ги омаловажува долгогодишните напори на партијата.
„Ова што тој го прави е политичка нечесност и навреда за нашето општество“, порача Хасипи, истакнувајќи дека ТДП останува „столб на политичката борба“ на турската заедница во земјата.
