Вчера успешно се заврши акцијата за која ЈП Водовод и канализација- Скопје уредно извести преку сите медиуми уште на 27.05.2025 година дека на 31.05.2025 година од раните утрински часови ќе се спроведе изведба на главен водоводен приклучок и монтажа на игличест регулационен вентил, што е потфат кој се прави ЕДНАШ НА 60 ГОДИНИ за подобрување на водоснабдувањето и притисокот на водата, како и намалување на загубите на вода и трае 15 часа.
Нивото на редовно водоснабдување утрово беше постигнато преку населено место Железара во општина Гази Баба, но поради преголема потрошувачка и повлекување од Чаир, мрежата се празни пребрзо, информираат денеска од ЈП Водовод и канализација.
Како што се наведува во соопштението, зафатот е завршен успешно, но за да нема дефекти на водоводната мрежа при повторно пуштање на водата под притисок, велат дека се работи полека и постепено со цел да се регулира мрежата.
– Се замолуваат граѓаните за трпение и рационално да користат се до стабилизација на мрежата во спротивно ќе предизвика Чаир недостаток за половина град кој може да трае со денови. Повеќето известувања од страна на ЈП Водовод и канализација Скопје беа пренесени од медиумите до јавноста, а веруваме и дека граѓаните разбираат која е сериозноста на зафатот кој еднаш мора да се направи, а тој ден беше вчера, стои во соопштението.
Со реализација на овој проект, велат, се подобруваат хидрауличките услови во водоводната мрежа.
– Со ваквото поврзување се создадаваат условите за формирање на циркуларен прстен за поврзување на двата магистрални цевководи во градот Скопје. Со монтирање на игличест регулационен вентил во ново изведена мерно регулациона шахта со пропратна хидротехничка опрема, како и поврзување на постоечкиот магистрален цевковод Ф 1600mm кај Железара, со постоечкиот магистрален цевковод Ф 700mm на булевар Александар Македонски кој се напојува од градскиот магистрален цевковод Ф 1600mm, преку ново предвидениот магистрален цевковод Ф 700mm, кој ќе биде поставен по должината на ново предвидениот бул.Хрватска, се наведува во соопштението.
