Јован Јанев, еден од поистакнатите членови на Левица, објави дека ја напушта партијата, откако во јавноста се појави видео во кое членови на Левица, заедно со српски обучувач, дискутираат како да ја искористат трагедијата во Кочани за организирање пленуми и политички активности.
Во својата објава, Јанев го изрази својот револт кон односот на партијата и остро ги осуди обидите за политичка експлоатација на трагичниот настан.
„ЈА НАПУШТАМ ЛЕВИЦА“
„Драги мои, оваа недела беше најтешка за сите нас, особено за нас од истокот. Сакав да ги испочитувам деновите на жалост и овие работи да ги коментирам подоцна. Официјално, сакам со вас да споделам дека ЈА НАПУШТАМ ЛЕВИЦА. Знаете дека политички веќе не сум активен повеќе од пола година, иако има многу интерни причини, ова ги надмина сите граници.“
Јанев во објавата ја цитираше скандалозната изјава „Мораме да ја искористиме ситуацијата максимално“, која, според него, била употребена од членови на партијата при дискусијата за настаните во Кочани.
Обвинувања за политичка манипулација со трагедијата
Јанев тврди дека партијата ја злоупотребува болката на луѓето за политички цели и дека целосно изгубила контакт со реалноста.
„Имам дома сестра, таа изгуби свој близок, изгуби сакан, секој ден плачеме по него. Имам другар кој се бори за живот, со кој од деца растевме и имаме милиони спомени. Имам сокласници и другари од Кочани (кои од УМС, СДММ, Црвена итд.) закопаа роднини и другари. Иста ни е болката.
А што разбирате вие? Нашиот левичарски дух треба да биде соживот со народот, а вие користите прилики како да добиете публицитет, седејќи во вашите удобни столчиња во Скопје. Немате грам чувство за тоа како НИЕ овде патиме и се чувствуваме.“
Тој ја осуди практиката на Левица да прави политички калкулации со човечки животи, обвинувајќи ја партијата дека „врз гробовите на нашите блиски градите кариери“.
Распад во партијата?
Јанев истакна дека неговата објава не значи дека сите членови на Левица се дел од оваа пракса, туку дека во партијата сè уште има квалитетни кадри, луѓе кои ги почитува. Сепак, тој смета дека Левица ја загубила својата првобитна идеолошка мисија.
„Другари, нашата идеологија за која се боревме таму не беше вака.“
Неговото заминување може да укаже на потенцијален раскол во партијата, особено ако други членови го следат неговиот пример.
Со својата објава, Јанев испрати и силна порака:
„Ако чувствуваш болка – жив си. Ако чувствуваш туѓа болка – човек си. Штета што голем дел од вас веќе не сте луѓе – станавте политиканти.“
Јанев завршува со предупредување: „Ќе дојде суден ден – за сите!“
