Познатиот кумановски оџачар, Амзир Рушити – Дино, повторно ја докажува својата големина. Овојпат, неговиот занает станува алатка за солидарност – тој нуди бесплатни услуги за сите граѓани кои ќе донираат за семејствата погодени од трагичниот настан во Кочани.
Наместо паричен надомест, Дино бара само еден доказ за хуманост:
Секој граѓанин кој ќе донира средства на здружението за изградба на спомен-обележјето „Патека на бесконечноста“, добива бесплатно чистење на оџакот.
Доволно е само да му се приложи уплатница како потврда за извршената донација.
Акцијата е ограничена на 63 оџаци во Куманово.
„Секој што ќе донира, ќе ми достави уплатница и јас бесплатно ќе му го исчистам оџакот. Верувам дека кумановци ќе покажат солидарност. Го познавам овој град, Куманово отсекогаш било хумано и верувам дека граѓаните ќе помогнат, секој според своите можности“, вели Дино.
Ова не е првпат Амзир да помага. Минатата година тој беше активен токму во Кочани, каде со поддршка на локалната власт и медиумите ги чистеше оџаците на настраданите. Исто така, неговата биографија е исполнета со акции за социјално загрозени семејства, самохрани родители и лица со попреченост.
Иако грејната сезона е на самиот крај, Дино смета дека ова е вистинскиот момент за подготовка на домовите, притоа правејќи добро дело.
Неговото мото е едноставно, но моќно: „Благословот е поважен од парите“.
„Да дадеме малку за да можеме сите заедно да направиме нешто добро. Дај боже вакви трагедии да нема, но кога ќе се случат, да покажеме дека сме луѓе и да подадеме рака“, порачува оџачарот со големо срце.
