Раководството на францускиот фудбалски клуб Ле Ман одржа прес-конференција во петокот за да ги претстави новите инвеститори и финансиски партнери во клубот. Бразилскиот инвестициски фонд „Оутфилд“ ќе има малцински удел во клубот, а секако најатрактивното име меѓу оние што ги споменуваат челниците на Ле Ман е српскиот тенисер Новак Ѓоковиќ, рекордер во историјата на својот спорт со 24 гренд слем титули.
Покрај сè уште активниот 38-годишен Ѓоковиќ, во овој проект се вклучени и шест години постариот Бразилец Фелипе Маса, поранешен возач на Формула 1 кој оствари 11 победи во текот на својата кариера, и 32-годишниот Данец Кевин Магнусен, кој исто така се натпреваруваше на светските првенства во Формула 1 од 2014 до 2024 година.
„Оваа информација не значи дека веднаш ќе обезбедиме место во елитната Лига 1 следната сезона. Мора полека да го градиме нашиот проект. Ле Ман е спортска престолнина на Франција, особено поради светски познатата трка „24 часа Ле Ман“. Исто така, фудбалскиот клуб има богата историска врска со Бразил и бразилските фудбалери“, рече претседателот на клубот Тиери Гомез.
Минатата сезона, Ле Ман играше во третата дивизија на Франција. Тие завршија втори и директно се промовираа во втората дивизија на Франција, заедно со шампионот на третата дивизија, Нанси.
