Јувентус претрпе тежок пораз од 5:2 на гостувањето кај Галатасарај во Истанбул, во првиот натпревар од плејофот во Лигата на шампионите. Турскиот тим одигра одличен натпревар и обезбеди убедлива предност пред реваншот во Торино.
Ноа Ланг, кој настапува како позајмен играч од Наполи, беше двоен стрелец за домаќините со голови во 49. и 75. минута. Во листата на стрелци се запишаа и Габриел Сара (15. минута), Давинсон Санчез (60. минута) и Саша Бое (86. минута). За Јувентус двата гола ги постигна Дејан Купмајнерс, во 16. и 32. минута. Италијанскиот тим од 67. минута играше со играч помалку, откако Хуан Кабал доби втор жолт картон. Реваншот ќе се игра во Торино на 25 февруари.
Во уште еден возбудлив натпревар, бранителот на трофејот ПСЖ славеше против Монако и покрај тоа што губеше со 2:0 по само 18 минути игра. Фоларин Балогун ги постигна двата гола за Монако, но парижаните се вратија во натпреварот. Витиња во 22. минута не реализираше пенал, а Дезире Дуе, кој влезе во игра по повредата на Усман Дембеле, веднаш постигна гол и асистираше за израмнување на Ашраф Хакими пред паузата. Во второто полувреме, по ВАР интервенција, Александар Головин доби црвен картон, а Дуе во 67. минута го постигна победничкиот гол. Реваншот ќе се игра во Париз на 25 февруари.
Во Лисабон, Реал Мадрид минимално ја совлада Бенфика со 1:0. Единствениот гол го постигна Винисиус Жуниор во 50. минута. По неговото славје, натпреварот накратко беше прекинат поради расистички навреди од трибините, по што играта продолжи. Реваншот ќе се игра во Мадрид.
Борусија Дортмунд обезбеди сигурна предност од 2:0 против Аталанта. Серу Гираси го отвори резултатот уште во 3. минута, а Максимилијан Баер го зголеми водството пред крајот на првото полувреме. Во продолжението не беа постигнати голови, а реваншот ќе се одигра во Италија на 25 февруари.
