Европскиот парламент (ЕП) се подготвува да го усвои годишниот извештај за напредокот на Македонија кон Европската Унија, кој – според најавите – на четири места ќе го содржи признавањето на македонскиот јазик и идентитет.
Ова ќе биде второ европско законодавно тело што формално ќе го стори тоа, по германскиот Бундестаг кој на 15 јуни 2023 година донесе одлука со која го признава македонскиот јазик.
Според бугарската новинска агенција „Бгнес“, признавањето е резултат на успешен консензус меѓу известувачот Томас Вајц од Австрија (Зелена партија) и уште седум „известувачи во сенка“ од различни политички групи во ЕП. Извештајот се очекува да биде официјално усвоен во јули.
Томас Вајц, чие политичко семејство – Зелената партија – е во коалиција со Европската слободна алијанса (ЕФА), организирал бројни средби со македонски претставници, вклучително и со 15 пратеници кои ги поканил во ЕП и со министерот за европски прашања Орхан Муртезани. Во извештајот целосно отсуствуваат ставовите и резервите на Бугарија во однос на македонскиот јазик, кој Софија го оспорува и го смета за вештачка кодификација од 1945 година.
Според „Бгнес“, бугарските европратеници Андреј Ковачев (ГЕРБ) и Ивајло Валчев (ИТН) предложиле повеќе од 40 амандмани, но речиси сите биле отфрлени од известувачите. Истовремено, шест предлози со кои ЕП експлицитно го признава македонскиот идентитет и јазик се прифатени.
Овој чекор претставува значаен политички и симболичен исчекор за Македонија на нејзиниот пат кон ЕУ, особено во контекст на долгогодишниот спор со Бугарија околу јазичните и историските прашања.
