Единаесет рудари загинаа, а шестмина се повредени откако бомба разнесе камион во југозападен Пакистан, соопштија во понеделникот локалните власти, пренесе Ројтерс.
Камионот превезувал работници во рудник во областа Харнаи во провинцијата Балуџистан, каде Пакистан се соочува со сепаратистички бунт.
„Импровизирана експлозивна направа била поставена покрај патот и експлодирала кога камион со рудари пристигнал на местото на несреќата“, изјавил претставник на паравоените сили.
Службеникот, кој сакаше да остане анонимен, додаде дека е можно да се работи за уред со далечински управувач.
Засега никој не ја презел одговорноста за нападот, јавува Ројтерс.
Заменик-комесарот на регионот Хазрети Вали Ага изјави дека во камионот имало 17 рудари кога експлодирала бомбата. Лекар од локалната болница изјави дека двајца од ранетите се во критична состојба.
