Skip to main content
Македонија

ДУИ бара предвремени парламентарни избори: На земјата ѝ е потребна долгорочна политичка стабилност

27/04/2025  19:49

ДУИ побара одржување на предвремени парламентарни избори заедно со локалните во октомври, предупредувајќи дека земјата оди во „погрешна насока“ и дека е неопходна итна политичка стабилизација за спас на европската перспектива.

Од интегративците велат дека само нов политички мандат може да обезбеди вистинска посветеност кон реформите и враќање на земјата на патот кон ЕУ.

Од Коалицијата ВРЕДИ ја обвинија ДУИ дека стравува од правдата и од „прочистување“ на институциите, нагласувајќи дека токму тие се одговорот на „распаднатата“ политика на интегративците.

„ВРЕДИ е во власта за да ја спроведе промената што Албанците гласно ја бараа и нема да застане сè додека секој Албанец не се чувствува слободен, еднаков и достоинствен во својата земја. Во октомври, на локалните избори, Вреди ќе ги освои сите албански општини! Ќе бидеме присутни во секоја општина и институција, со чисти раце и чист образ“, порачаа од ВРЕДИ.

Подготвеност за предвремени парламентарни избори веќе изразија и другите партии од Европскиот фронт, како и македонската опозиција. Од друга страна, Централниот комитет на ВМРО-ДПМНЕ денеска оцени дека Владата е стабилна и дека успешно ги исполнува очекувањата на граѓаните.