Поранешниот претседател на Република Српска Милорад Додик денес во Сочи објави дека ќе се сретне со рускиот претседател Владимир Путин на 2 октомври и ќе го замоли да го „стави Балканот во фокусот“ со цел да се усогласат политиките на Русија и САД во врска со Балканот, и изјави дека ќе предложи формирање на балканска комисија, со претседателство од Унгарија.
Додик за РТРС изјави дека најважно е да се запре вооружениот конфликт во Украина и верува дека Русија и Америка ќе постигнат договор.
„Се надевам дека во нивните разговори (Путин и Трамп) ќе го постигнат ова. За време на средбата со Путин, ќе го замолам да го стави и Балканот во фокусот и да ги усогласи политиките на Русија и САД во врска со самиот Балкан – можеби преку формирање на балканска комисија од Русија и САД, со претседателство од Унгарија“, рече Додик.
Тој нагласи дека е многу важно да се избегнат „страствените Германци, Британци и Бриселци“ во овие разговори, бидејќи, како што изјави, тие го демонстрирале своето малигно влијание, речиси секој ден и во секое прашање што го нагласувале.
„Тие беа само на едната страна – бошњачко-муслиманската страна, а тоа најдобро се гледа преку последната посета на комесарката за проширување на ЕУ, Марта Кос, на БиХ, која беше исклучиво поврзана со ставовите на Бошњаците. Тоа не придонесува за решение. Го видовме и нивниот обид да ги мајоризираат работите во БиХ, но тоа не функционираше“, рече Додик.
Додик рече дека ќе се сретне со Путин на 2 октомври.
Тој претходно објави дека Алијансата на независни социјалдемократи (СНСД) ќе го номинира министерот за научен и технолошки развој и високо образование на Република Српска, Синиша Каран , за претседател на Република Српска на меѓуизборите .
