Министерот за внатрешни работи на Србија и лидер на СПС, Ивица Дачиќ, се наоѓа во тешка здравствена состојба и е хоспитализиран на Клиниката за пулмологија во Клиничкиот центар на Србија, потврди доктор Спасоје Поповиќ, помошник-началник на клиниката.
Според Поповиќ, Дачиќ моментално се лекува на одделението за интензивна нега, каде е приклучен на механичка вентилација и прима целосна медицинска терапија.
„Тој е во многу сериозна состојба, се наоѓа на интензивна нега, на механичка вентилација и ги прима сите потребни лекови. Во овој момент се бориме за неговиот живот“, изјави Поповиќ за телевизијата Информер, додавајќи дека подетални информации за здравствената состојба се очекуваат во наредните денови.
Лекарите посочуваат дека Дачиќ бил примен во значително влошена општа состојба, поради што било неопходно итно приклучување на апарати за дишење, со цел да им се овозможи на белите дробови да се стабилизираат.
„Кислородот во неговата крв беше многу низок. Немавме друг избор освен да го поврземе на механичка вентилација за да купиме време белите дробови да се одморат“, објасни Поповиќ.
Тој додаде дека во одреден момент Дачиќ кратко дишел без апарат, но состојбата повторно наложила примена на механичка вентилација.
Според лекарскиот тим, следните 72 часа ќе бидат клучни за понатамошниот тек на лекувањето и прогнозата за закрепнување.
