
Трагедијата во Кочани, освен што предизвика гнев и револт кај граѓаните, на површина ги извади и лошите односи внатре во владејачкото мнозинство.
Иако разногласија имаше и претходно, особено на релација ВРЕДИ – ЗНАМ, но и ЗНАМ – ВМРО-ДПМНЕ во последните две недели тие се засилија.
Зборувајќи за состојбите во правосудството, каде работите не се мрднати од мртва точка, еден од некогашните најблиски соработници на Никола Груевски и човек кој куртули од кривичен прогон во предметот „Моќник“, Антонијо Милошоски, прстот за одговорноста го впери кон министерот за правда Игор Филков кој доаѓа од редовите на ЗНАМ.
Филков не остана должен па Милошоски го нарече „кусурот на Груевски“ распалувајќи канонада напади кон пратеникот на ВМРО-ДПМНЕ.
Можеби Филков и Милошоски имале лош ден, но владината коалиција дефинитивно има лоши 10 месеци
Секој може да има лош ден, рече премиерот Христијан Мицкоски коментирајќи ја препирката меѓу пратеникот и министерот.
Но, ако тие двајца имале лош ден, се чини дека целата коалиција во Владата дефинитивно има лош ден, кој трае безмалку 10 месеци.
Дека не е сјајно на Илинденска зборува и фактот што освен меѓу, се појавија и внатрепартиски разединувања.
Зборувајќи за функционирање на системот, претседателот на Советот на Град Скопје, Трајко Славески рече дека за хаосот, придонела и регулаторната гилотина со што прстот го впери кон екс министрите Зоран Ставревски и Владимир Пешевски, кои сега се дел од советниците на Мицкоски.
Од друга страна големи несогласувања има и во коалицијата ВРЕДИ. Таму, Алијанса за Албанците на министерот Арбен Таравари е со една нога надвор од партиската, а се чини и од владината коалиција.
Синоќешниот состанок во оваа партија не даде епилог на прашањето дали АА ќе остане во ВРЕДИ или ќе се сврти кон соработка со ДУИ,
И Силјановска – Давкова по стапките на Данела?
ВМРО-ДПМНЕ и градоначалничката на Скопје, Данела Арсовска веќе одамна „се гледаат преку нишан“ а последните случувања со излеаната Маркова Река и меѓусебните препукувања на релација Арсовска – Орце Ѓорѓиевски (најголем фаворит за иден кандидат за градоначалник на Скопје) само потсетија на меѓусебниот анимозитет.
Но, текот на случувањата води кон заклучок дека и претседателката Гордана Силјановска Давкова може да се најде на листата „политички непријатели“ на ВМРО-ДПМНЕ и Мицкоски.
Давкова кој беше кандидатка на ВМРО-ДПМНЕ далеку од очите на јавноста ја врши својата протоколарна задача, а во последните месеци речиси и да нема јавна комуникација со кој било владин функционер од ВМРО-ДПМНЕ.
Се добива впечаток дека Владата и ВМРО-ДПМНЕ целосно ја имаат изолирано претседателката, па оттаму не е исклучено, во даден момент кога Мицкоски ќе процени дека тоа ќе донесе бенефит и целосно да се оддалечат од Давкова, по примерот на Арсовска.