Кандидатот за градоначалник на Чаир, Бујар Османи, остро реагираше на последната изјава на градоначалникот на Куманово, Максим Димитриевски, кој повторно го нападна принципот на Бадентеровото мнозинство, еден од клучните елементи на Охридскиот рамковен договор. Според Османи, ваквите ставови се дел од одамна подготвена стратегија чија цел е поништување на договорот што ја гарантира мултиетничноста и стабилноста на државата.
„Мислам дека ова е веќе видена стратегија. Планот за анулирање на Рамковниот договор постои одамна. Само што тогаш не можеа да го реализираат – им требаше албански партнер што ќе им даде легитимитет пред народот и странците. Сега го најдоа“, предупреди Османи.
Османи јасно посочи дека ударот врз балансерот, системот кој обезбедува правична етничка застапеност во институциите, најмногу ќе ги погоди токму македонските граѓани во Чаир.
„Македонците во Чаир беа најзаштитени токму од балансерот. Благодарение на него, општината мораше да ги вработува и нив согласно бројот. И тие ми велат: ова е директен удар врз нивната безбедност.“
Балансерот, според Османи, не е привилегија, туку фер систем кој овозможува рамноправност за сите – за Албанци, Македонци, Роми и другите заедници. Поради тоа, неговото укинување не е во интерес на ниту една етничка група, туку претставува „противдржавен проект“ што цели кон подривање на соживотот.
„Ова не е албански или македонски интерес. Ова е противдржавен интерес.“
