Азербејџан денеска затвори дел од својот воздушен простор во јужниот дел на земјата, во близина на Иран, откако беше соопштено дека четири ирански дрона ја прелетале границата.
Затворањето на воздушниот простор ќе трае 12 часа, според известувањето до пилотите (NOTAM) што го издаде Азербејџан, објави 4news.mk
Претходно, претседателот на Азербејџан, Илхам Алиев, го обвини Иран за „тероризам“ и се закани со одмазда, откако во напад со дронови во четвртокот беа ранети четири лица – инцидент што би можел да вовлече уште една држава во конфликтот на Блискиот Исток.
Техеран ги отфрли обвинувањата и го обвини Израел, сојузник на Азербејџан, дека се обидува да предизвика провокација.
Нападите околу пладне вклучувале најмалку четири дрона кои од Иран влегле во азербејџанската ексклава Нахичеван, соопштија властите во Баку.
„Денеска од иранска страна беше извршен терористички чин врз територијата на Азербејџан“, изјави Алиев на итно свиканата седница на Советот за безбедност.
Тој додаде дека азербејџанската војска „добила наредба да се подготви и да спроведе мерки на одмазда“, нагласувајќи дека е ставена на највисоко ниво на мобилизација и мора да биде подготвена за изведување на каква било операција.
„Оние нечесни луѓе кои го извршија овој терористички чин против нас ќе зажалат. Нека не ја тестираат нашата сила… Оваа дамка никогаш нема да биде избришана од нивното валкано и грдо лице“, порача Алиев.
