Aмериканскиот министер за трговија, Хауард Лутник, упати остри критики кон Европа, предизвикувајќи инцидент на ексклузивна вечера организирана од извршниот директор на „Блекрок“ (BlackRock), Лари Финк. Ова се случи на годинешниот состанок на светскиот економски форум во Давос.
Претседателката на Европската централна банка (ЕЦБ), Кристин Лагард, ја напуштила вечерата додека Лутник ја критикувал европската енергетска политика и опаѓањето на глобалната конкурентност на регионот. Според присутните, Лутник ги омаловажувал економските капацитети на Европа во споредба со САД, што предизвикало негодување, довикувања, па дури и напуштање на салата од страна на дел од гостите. Додека портпаролот на Лутник тврди дека никој не заминал предвреме, извори од ЕЦБ одбија да дадат официјален коментар, иако некои учесници сугерираат дека Лагард заминала бидејќи била изморена.
Лутник упати директна порака дека глобализацијата е „пропадната политика“ која ги изневерила Западот и САД. Тој истакна дека администрацијата на американскиот претседател Доналд Трамп е решена да го промени постојниот економски модел кој ги запоставил американските работници преку офшоринг и барање на најевтина работна сила.
– Тука сме да испратиме јасна порака: Глобализацијата ја поткопа домашната индустриска база и ги ослабна националните економии. Моделот ‘Америка на прво место’ е поинаков пристап кој ги става сопствените работници во центарот на одлучувањето и ги охрабруваме и другите земји да го разгледаат овој модел, изјави Лутник.
Тој особено ги критикуваше европските цели за јаглеродна неутралност до 2030 година, оценувајќи ги како контрадикторни. Според него, фокусирањето на соларна и ветерна енергија без сопствено производство на батерии значи свесно прифаќање на зависноста од Кина. Лутник, претходно ги обвини европските земји за трговски протекционизам кон американските производи како пилешко, јастози и говедско месо.
На ваквите ставови реагираше поранешниот индиски секретар за надворешни работи, Канвал Сибал, кој на социјалната мрежа „Икс“ напиша дека Лутник се служи со „пригодни измами“. Сибал потсети дека токму САД беа главната сила зад глобализацијата по распадот на Советскиот Сојуз, користејќи ја за зацврстување на својата глобална хегемонија и финансиска доминација.
