Џаред Кушнер планира да изгради два мегаресорти во делтата на реката Вјоса во Албанија. Тоа е заштитено подрачје, поради што многу активисти и експерти за животна средина се на штрек. Тие веруваат дека со дозволувањето на вакви проекти во најеколошки разновидните и загрозени подрачја, албанскиот премиер Еди Рама всушност му се додворува на Доналд Трамп.
Покрај широките економски влијанија што ги предизвикува американскиот претседател Доналд Трамп преку своите извршни наредби, првенствено царините, тој го шири своето влијание и преку директни проекти низ целиот свет.
Веќе е познато дека неговиот зет Џаред Кушнер сака да изгради луксузен хотелско-деловен-станбен комплекс на местото на бомбардираниот Генерален штаб на ЈНА во Белград. Пред неколку години, Кушнер, исто така, го насочи вниманието кон Албанија, а тој проект дури сега привлече внимание.
Имено, тој планира да изгради луксузен туристички комплекс во лагуната Нарта, само еден дел од делтата на реката Вјоса, една од најеколошки разновидните области во Европа, како и на блиското островче Сазан. Досега, поголемиот дел од оваа област е недопрен, но тоа не би требало да биде случај наскоро.
Пред четири години започна изградбата на аеродром во северниот дел од лагуната Нарта. Работата во моментот е при крај, и покрај противењето на албанските и меѓународните невладини организации кои се занимаваат со заштита на природата, повикувајќи се на Конвенциите на Советот на Европа за зачувување на европскиот див свет и природните живеалишта.
Заштитена зона
И покрај фактот што Министерството за туризам и животна средина на Албанија ја прогласи делтата на реката Вјоса за „критично загрозена“, а Меѓународната унија за зачувување на природата ја наведува локацијата како „речиси загрозена“, албанскиот парламент минатата година му даде овластување на посебен комитет предводен од премиерот Еди Рама да одобрува големи проекти за туристичка инфраструктура во заштитени подрачја. Интересно е што оваа одлука е донесена само три дена откако Кушнер ги објави своите проекти.
И зборуваме за одморалиште кое ќе содржи 6.000 сместувачки единици и ќе се простира на 450 хектари. Покрај луксузните апартмани и вили, одморалиштето ќе вклучува трговски центар, базени, марини и пристаниште за јахти и бродови што ќе пловат во правец на новиот аеродром. Покрај тоа, Кушнер планира слично одморалиште од 570 хектари на ненаселениот остров Сазан, шест наутички милји од брегот на делтата на реката Вјоса, но во рамките на морски национален парк.
Предминатата година, реката Вјоса беше прогласена за национален парк по целата нејзина должина, освен делтата, која беше заштитена од експлоатација со други прописи и меѓународни конвенции, кои очигледно беа укинати со минатогодишниот потег на парламентот.
Целиот текст на Независен со клик ТУКА.
