Стотици федерални службеници кои беа отпуштени по налог на Министерството за ефикасност на владата (DOGE) во САД добија понуда да се вратат на своите стари работни места.
Администрацијата за општи услуги (GSA) им даде рок до крајот на неделата на вработените, кои управуваа со владините работни простори, да ја прифатат или одбијат понудата за враќање на работа, според интерен документ во кој имале увид повеќе медиуми.
Како што се наведува, сите кои ќе ја прифатат понудата мора да се појават на работа на 6 октомври, по она што „се сведе на седуммесечен платен одмор“.
– На крајот, исходот беше дека агенцијата остана во нефункционална состојба и со недоволно вработени. Немаа луѓе кои им беа потребни за извршување на основните функции, рече Чед Бекер, поранешен службеник за недвижнини во GSA.
