Украински борбен авион F-16 е соборен во текот на ноќта за време на масовен руски напад со ракети и дронови, при што животот го загуби и неговиот пилот, соопшти денеска украинската армија. Станува збор за трет загубен F-16 од почетокот на војната, според податоците на украинското воено воздухопловство.
Пилотот ги искористи сите вооружени системи на леталото и успеа да собори седум воздушни цели. При соборувањето на последната, авионот беше оштетен и почна да губи висина“, се наведува во соопштението објавено на каналот на Военото воздухопловство на Украина на Телеграм.
Пилотот направил обид да го оддалечи авионот од населено место, но, според војската, немал доволно време за безбедно катапултирање.
Руската армија, според украинските власти, во текот на ноќта истрелала вкупно 477 дронови и 60 ракети од различни типови кон украинска територија. Украинската ПВО успеала да уништи 211 дронови и 38 ракети. Воздушни напади се регистрирани на најмалку шест локации низ земјата.
Инцидентот дополнително го истакнува интензитетот на руските воздушни офанзиви и предизвиците со кои се соочува украинската авијација, и покрај воведувањето на западна технологија како што се авионите F-16.
