Невладините организации кои работат на женските права и со жртвите на семејно насилство се согласни дека убиството на 29-годишната Емилија Пешева треба да се квалификува како фемицид. Жртвата претходно пријавила насилство, но постапката против Ф.З кој го изврши убиството врз неа е запреноа на 2 септември потврдија и од Центарот за социјални работи во Штип. Образложението било дека предупредувањето од полицијата имало влијание врз неговото однесување, но и дека ќе ја заштитат родителите.
Добиј ги најважните вести, бесплатно на Viber
Бети Пеева од невладината „ЕХО“ од Штип за МИА вели дека подолг временски период бараат законски измени, со цел кривичното гонење против насилнокот да оди по службена должност.
Ние имаме кривично гонење по предлог на жртвата, а голем дел од нив ги повлекуваат своите пријави до полицијата и може да се случи дури и кога ќе биде покреното и кривично гонење е странката во меѓувреме да ја повлече таа пријава и тогаш институциите остануваат со врзани раце и не можат да преземат ништо во таа смисла. Поради тоа често се случува самите насилници да добијат уште поголема сила и моќ да продолжат понатаму со насилството, вели Пеева.
Психологот, Стојне Митева од струмичкото здружение „Скај плус“ кое раководи со шелтер центар вели дека во изминатиот период имаат згрижено голем број на жртви на семејно насилство од Штип, меѓу кои и жртви на тешки форми на насилство.
Сметам дека овде треба да го кренеме алармот, да се зголеми координацијата меѓу институциите и многу внимателно да се следат насилниците, бидејќи праксата покажува дека, честопати насилството, прераснува во убиство за жал. Убиството на жени е фемицид и важно е така да се квалификува, бидејќи оваа и многу други жени се убиени само затоа што се жени, вели Митева.
Таа посочува дека во шелтер центарот во Струмица во текот на годинава се згрижени околу 30 жртви на семејно насилство, заедно со нивните деца. Во Штип завчера беше убиена Пешева од нејзиниот поранешен партнер, кој и претходно има извршено насилство. На сторителот на делото му е одредена мерка притвор од 30 дена. Инаку казните за сторено кривично дело фемицид се движат од 10 години до доживотен затвор.
