Единствениот естраден магазин „Бекстејџ“ ја започнува новата 14-та сезона во која најавуваат многу новитети. Еден од новитетите е тоа што првата недела ваши домаќини ќе бидат јавни фаци кои ќе го задржат вашето внимание.
Во понеделник водител ќе биде фолк пејачката Елена Велевска, во вторник водител ќе биде Андреј од дуото ДНК, во среда ќе се дружите со Тамара Тодевска. Кои останати јавни личности ќе се најдат во истата улога останува да видиме во 16:15 премиерно и 22:15 репризно на Телма.
„Во 2008 стартувавме со ентузијазам. Денес, продолжуваме со искуство и сериозна тежина зад себе. Низ годините се развивавме како жив организам. И до ден денес сме жива материја која подлежи на голем број промени. После долги години од нашето раѓање и медиумски живот, сфативме дека нашето најголемо достигнување е изразот. И новинарскиот и визуелниот. И по однос на емисии и по однос на прослави, настани и организации. Бекстејџ е своевиден пионер кога станува збор за вакви емисии. Не следиме трендови туку ги креираме. Од хрома во студио. Од студио на терен. Од интервју до репортажа, Бекстејџ има свој печат кој што се разликува од останатите“, вели уредничката Ева Јакимовска.
Сите естрадни актуелности, ексклузивни интервјуа, исповести, но и рубрики ќе бидат само дел од новите содржини во новата 14-та сезона.
„Like“ „Dislike“ е рубрика во која стручни ликови ќе го коментираат изгледот на познатите, „Едноставен живот“ рубрика во која познатите ќе ги видиме во светло какво што најмалку очекуваме, „Вирално” ќе се бави со тоа што познатите објавуваат на социјалните мрежи. Ова е само дел од сето она што не очекува во новата сезона на „Бекстејџ“.
