Претседателот на Србија, Александар Вучиќ, најави можност за одржување референдум за негово разрешување. Оваа изјава ја објави на својот официјален Инстаграм профил, откако Центарот за истражување, транспарентност и одговорност (ЦРТА) соопшти дека мнозинството граѓани на Србија се изјасниле за негово отстранување од функцијата.
– „Објективната и непристрасна ЦРТА информираше дека огромно мнозинство граѓани се за моја смена. Ако овие наводи се точни, тогаш опозицијата треба да поднесе 67 потписи, а тие имаат над 80, за да се организира советодавен референдум. Ова е фер понуда, и добро е конечно да се расчистат работите,“ изјави Вучиќ.
Тој нагласи дека секогаш се борел за народот и дека граѓаните се неговата сила. Со ова, Вучиќ ја остави можноста граѓаните да одлучат за неговиот мандат преку демократска процедура, додавајќи дека овој чекор би бил корисен за расчистување на политичката ситуација во земјата.
ЦРТА, како невладина организација, предизвика внимание со своите истражувања, а реакцијата на Вучиќ дополнително ја засили јавната дебата за неговата позиција како претседател.
