Доналд Трамп изјави дека ќе му исплати на секој возрасен Американец „дивиденда од Трамп“ од 5.000 долари (4.300 евра) ако републиканците ја задржат контролата врз Конгресот на среднорочните избори во ноември.
„Доколку републиканците победат во Претставничкиот дом и во Сенатот – двата дома, поради нашата огромна економска сила и успех, ќе исплатам дивиденда од 5.000 долари на секој возрасен граѓанин на Соединетите Американски Држави. Единствениот услов е оваа дивиденда да мора да се потроши во Соединетите Американски Држави“, рече Трамп во Далас на првата конвенција на Републиканската партија посветена на среднорочните избори.
Но, Ројтерс пишува дека не било веднаш јасно како ќе се вршат плаќањата или дали тие ќе бидат легални. Со оглед на тоа што во САД живеат околу 270 милиони возрасни лица, потфатот би чинел приближно 1,35 трилиони долари (1,16 трилиони евра).
Трамп ги поврзува изборите со неговиот мандат
За време на својот говор, Трамп се пофали со „двете најдобри години во историјата на претседателството“, ставајќи се себеси во центарот на изборите и покрај неговата растечка популарност.
Сепак, не беше јасно дали неговиот говор во стилот на кампањата ќе им се допадне на клучните неопределени гласачи кои, според анкетите, се оддалечија од партијата на Трамп поради растечкото незадоволство од трошоците за живот и војната со Иран, анализираше Ројтерс.
„Ако ја оставиме иднината на Америка на радикално левите демократи, на нашата земја ќе ѝ треба цела следната деценија само за повторно да застане на нозе. Гласајте за републиканци и ќе го оставиме остатокот од светот далеку зад себе, и тоа со генерации“, рече Трамп
