Австриската полиција уапси македонски државјанин кој бил баран поради сомнение дека со нож тешко повредил маж за време на средба поврзана со купопродажба на дрога во Велс.
Според информациите на полицијата во Горна Австрија, осомничениот бил лоциран и уапсен во средата претпладне на железничката станица „Вестбанхоф“ (Westbahnhof) во Виена. По апсењето, тој бил спроведен во затвор во Велс.
Случајот за кој се товари се случил на 29 април годинава во пансион во Велс. Според полициските сознанија, при средба за купопродажба на дрога дошло до вербална расправија меѓу осомничениот и купувачот.
Расправијата прераснала во физички напад, при што осомничениот наводно употребил нож и му нанел тешки телесни повреди на другиот маж.
По нападот, осомничениот ја напуштил Австрија, а според австриската полиција, извесен период престојувал во Македонија.
Неговото бегство завршило во средата, кога повторно пристигнал во Австрија. Безбедносните служби го лоцирале на виенскиот „Вестбанхоф“, каде што бил уапсен.
По приведувањето, осомничениот е предаден на надлежните органи и спроведен во затвор во Велс, каде ќе се соочи со постапката за нападот за кој е осомничен.
