Јадењето доцна навечер има значително влијание врз апетитот, начинот на кој телото ги троши и складира калориите, што може да го зголеми ризикот од дебелеење, покажуваат научни истражувања. Доколку се обидувате да ја намалите телесната тежина, времето кога го јадете последниот оброк може да биде важен фактор.
Дебелината претставува еден од најголемите здравствени проблеми на современото општество. Денес калориите се полесно достапни од кога било, додека седечкиот начин на живот е сè почест. Додека порано било потребно да се вложи значителен физички труд за да се обезбеди храна, денес ситуацијата е речиси обратна – калориите лесно ги внесуваме, но многу потешко ги трошиме.
Истовремено, брзата и висококалорична храна, богата со масти и шеќери, е широко достапна, а прекумерната телесна тежина е поврзана со низа здравствени проблеми, меѓу кои инсулинска резистенција, дијабетес и кардиоваскуларни заболувања.
Многубројни студии покажуваат дека доцните оброци можат да бидат фактор што го зголемува ризикот од зголемување на телесната тежина. Научниците со години истражуваат колку времето на оброците е важно за контролата на тежината, а истражување спроведено од научници поврзани со Медицинскиот факултет на Харвард и Brigham and Women’s Hospital во Бостон се обиде подетално да ги објасни механизмите што стојат зад оваа поврзаност.
Истражувачите се фокусирале на три важни фактори – регулирањето на апетитот, потрошувачката на енергија и молекуларните промени во масното ткиво.
Резултатите покажале дека доцното јадење може да влијае на организмот на неколку начини.
Зголемен апетит: Кога оброците се внесуваат подоцна во текот на денот, се менуваат нивоата на хормоните што го регулираат гладот и ситоста. Особено е забележано намалување на лептинот, хормон кој испраќа сигнал дека организмот е сит, што може да придонесе за посилно чувство на глад.
Помала потрошувачка на енергија: Истражувањето покажало дека организмот троши помалку енергија кога храната се консумира подоцна, што значи дека во одреден период може да се согоруваат помалку калории.
Поголема склоност кон складирање масти: Доцните оброци биле поврзани и со промени во масното ткиво кои го фаворизираат складирањето на мастите, наместо нивното разградување.
Комбинацијата од поголем глад, помала потрошувачка на енергија и поголема склоност кон складирање масти може да помогне да се објасни зошто навиката да се јаде доцна навечер се поврзува со поголем ризик од зголемување на телесната тежина.
Наодите дополнително покажуваат дека за одржување здрава телесна тежина не е важно само колку и каква храна внесуваме, туку улога може да има и времето кога ги јадеме оброците. Сепак, вкупниот внес на калории, квалитетот на исхраната, физичката активност и индивидуалните навики остануваат важни фактори за контролирање на телесната тежина.
