Двајца државјани на Република Косово се лишени од слобода во Скопје под сомнение дека сториле кривично дело „фалсификување пари“, откако при полициска контрола во нивното возило биле пронајдени пари во различни валути со вкупна вредност од околу 230.000 евра.
Како што информира МВР, на 3 август 2026 година полициски службеници од Единицата за интервентна полиција при СВР Скопје ги привеле Ф.Р. (30) и Т.Т. (44), двајцата државјани на Република Косово, поради основано сомнение за сторено кривично дело „фалсификување пари“ по член 268 од Кривичниот законик.
При преглед на патничко возило „голф“, во кое се превезувале осомничените, биле пронајдени пари во различни валути и апоени – евра, американски долари, швајцарски франци и британски фунти, со вкупна вредност од околу 230.000 евра.
Парите биле одземени, а двете лица биле спроведени во Полициската станица Центар за понатамошна постапка.
По целосно документирање на случајот, во координација со надлежен јавен обвинител, против нив ќе биде поднесен соодветен поднесок.
