Шпанската полиција влезе во седиштето на владејачката Социјалистичка партија (PSOE) во Мадрид со судски налог за да собере информации за можна нелегална финансиска шема од страна на поранешен член на партијата, објави јавниот радиодифузен сервис RTVE.
Леире Диез е осомничена за нелегални плаќања поврзани со државниот холдинг СЕПИ, кој учествува во управувањето со некои стратешки компании.
Оваа операција доаѓа два дена откако, во друг случај „Плус Ултра“, судија побара сведочење од поранешниот социјалистички премиер Хозе Луис Родригез Запатеро, осомничен за кривични дела злоупотреба на влијание и перење пари.
Санчез е под притисок
Сопругата на сегашниот премиер Педро Санчез, исто така, е под истрага за злоупотреба на влијание. Полицијата веќе влезе во седиштето на PSOE во Мадрид на 20 јуни 2025 година, кога тогашниот секретар на партијата, Сантос Сердан, беше обвинет за наводно манипулирање со договори за јавни работи, иако барањето за информации во таа пригода се однесуваше само на социјалистичкиот лидер.
Најновите скандали би можеле да му наштетат на премиерот Санчез, кој е на власт од 2018 година, а кој се соочува со парламентарни избори следната година.
Санчез денес е во Ватикан на средба со папата.
Лидерот на опозициските конзервативци, Алберто Нуњез Фејџо, за медиумите изјави дека Санчез треба да распише предвремени избори.
