Триесет и шестгодишен државјанин на Северна Македонија е уапсен во Салцбург под сомнение дека учествувал во брутален грабеж во Германија, по кој починал 93-годишен маж. Осомничениот бил баран со европска потерница, а по апсењето е пренесен во затворот Пух-Урштајн во близина на Салцбург.
Според информациите од австриската полиција, акцијата за апсење била спроведена во населбата Елизабет-Форштат, во близина на главната железничка станица во градот.
Истражителите наведуваат дека жртвата починала како последица на тешките телесни повреди здобиени при нападот.
Иако германските и австриските власти засега официјално не потврдуваат дека станува збор за истиот случај, повеќе детали упатуваат дека уапсениот е поврзан со грабежот што се случи за време на првиот мајски викенд во Келн.
Тогаш, според германските медиуми, непознати сторители провалиле во бунгалов на 93-годишен маж, физички го нападнале, а потоа го пребарале домот и избегале со пленот. На 3 мај, неговите деца го пронашле мртов во куќата, а обдукцијата покажала дека смртта настапила како последица на тешките повреди.
Германската полиција претходно уапсила двајца осомничени – 30-годишник и 59-годишник, додека по трет осомничен, 36-годишен маж, сè уште се трагало.
По последното апсење во Австрија, во тек се дополнителни истраги и координација меѓу австриските и германските правосудни органи околу можната екстрадиција на осомничениот во Германија.
