Премиерот Христијан Мицкоски упати честитка по повод 5 Мај – Денот на македонскиот јазик во која порачува дека македонскиот јазик е темелот врз кој се издигнува нашата духовна и национална самобитност.
Нашата должност денес, како што посочува премиерот, е јасна и возвишена да го негуваме, унапредуваме и достоинствено претставуваме македонскиот јазик, како дома, така и на меѓународната сцена.
-Во време на предизвици, потребна е мудрост, единство и непоколеблива верба во вредностите што не дефинираат.
Како општество и како држава, остануваме цврсто определени да го заштитиме и афирмираме македонскиот јазик како неотуѓиво културно и историско наследство. Тој е наша заедничка обврска, но и наша заедничка иднина. Нека 5 Мај биде потсетник дека преку јазикот ја чуваме душата на народот. Честит Ден на македонскиот јазик! – вели премиерот Мицкоски во честитката.
