Глобалниот ценовен шок предизвикан од случувањата во Иран доведе до зголемен притисок на граничните премини во регионот, при што денеска е регистриран невообичаено голем проток на возила на преминот Ќафасан.
Според извештаите и снимките објавени од Euronews Albania, илјадници граѓани од Албанија чекаат во долги редици за влез во Северна Македонија, со цел да купат гориво и основни прехранбени производи по пониски цени.
Според информациите од терен, за преминување на границата се чекало и повеќе од два часа. Слични сцени на масовен премин се забележани и на албанско-грчката граница кај Какавија.
Во меѓувреме, Владата уверува дека состојбата е стабилна и дека нема ризик за енергетската сигурност. За утре во Скопје е закажана вонредна владина седница, на која, според најавите на премиерот Христијан Мицкоски, ќе се разгледа намалување на акцизите на горивата.
Целта на оваа мерка е да се ублажи ценовниот притисок врз домашните потрошувачи и да се спречи евентуален нов бран поскапувања.
Мицкоски ги отфрли шпекулациите за воведување рестрикции или ограничување на количините гориво.
„Во моментот немаме никакви индиции дека би имало потреба од ограничување. Напротив, гледаме дека и граѓани од соседните земји доаѓаат кај нас и ги полнат своите резервоари“, изјави премиерот.
На прашањето дали Владата ќе воведе мерки за штедење енергенси по примерот на некои земји од Европската Унија, тој беше дециден дека во моментов нема таква потреба.
