Во Основнот кривичен суд денеска продолжи судењето за трагичниот настан од 2 март, кога мајката Ивана и нејзината шестгодишна ќерка Катја си ги одзедоа животите со скок од зграда во населбата Тафталиџе.
Клучен сведок на рочиштето беше наставничка на Катја, која откри дека институцијата била алармирана за насилството во домот уште на самиот почеток на учебната година.
Наставничката посведочи дека уште на првата родителска средба на 3 септември, наместо родителите, се појавила бабата на девојчето.
„Кога прашав зошто родителите не се присутни, бабата почна да плаче. Ми кажа дека Ивана не е во состојба да дојде бидејќи е жртва на семејно насилство од страна на таткото Стојанче“, изјави наставничката пред судот.
Потресно беше сведоштвото за моментот кога насилството од домот се рефлектирало во училницата. За време на игра со другарчињата, Катја паднала на подот, а на прашањето на наставничката што играат, шестгодишното девојче одговорило: „Вака паѓа мама кога тато ја удира“.
По овој инцидент, училишниот психолог извршил разговор со мајката Ивана на 16 септември. На Ивана ѝ било укажано каде да побара помош за семејно насилство, а на наставниот кадар му било наредено будно да ја следи состојбата на Катја.
Сепак, наставничката истакна дека во периодот што следувал, девојчето изгледало среќно и социјализирано.
Состојбата се дестабилизирала пред Нова година. Бабата ја информирала наставничката дека Ивана одлучила да се врати кај сопругот, изразувајќи сериозна загриженост за нивната безбедност. По зимскиот распуст, наставничката забележала промена кај Ивана – на родителската средба изгледала отсутно и си заминала веднаш по завршувањето, избегнувајќи подлабок разговор.
Последниот ден на Катја во училиштето поминал во навидум вообичаена атмосфера. Бабата ја донела на училиште, а наставничката забележала дека девојчето носи нова облека со сè уште закачени етикети.
„Катја беше многу среќна. Ми рече: ‘Вчера бевме на шопинг со мама’. Не носеше униформа, но зрачеше со радост“, се присети наставничката.
Иако првично било најавено дека бабата ќе ја земе Катја, мајката Ивана се појавила во училиштето околу 13:30 часот, додека децата биле на час по физичко образование. Таа ја зела ќерка си и го напуштиле училишниот двор. Неколку часа подоцна, наставничките ја примиле веста за трагедијата.
