Уметнички дела вредни неколку милиони евра се украдени од престижната фондација „Мањани Рока“ во италијанската област Парма.
Кражбата се случила ноќта меѓу 22 и 23 март, кога крадците упаднале во Вила Мањани преку пробивање на влезната врата.
Според информациите на италијанските медиуми, од „француската соба“ на првиот кат се одземени три ремек-дела на светски познати автори: „Риба“ од Пјер-Огист Реноар, „Мртва природа со цреши“ од Пол Сезан и „Одалиска на терасата“ од Анри Матис.
Истрагата за овој голем грабеж ја водат карабинерите од Парма во соработка со специјалната единица за заштита на културното наследство. Како дел од доказниот материјал веќе се обезбедени и се анализираат снимките од видео надзорот на објектот.
Фондацијата „Мањани Рока“ се смета за една од најзначајните уметнички институции во Италија, која ја чува бесценетата колекција на Луиџи Мањани, вклучувајќи дела од великани како Тицијан, Рубенс, Гоја и Моне. Оваа институција е основана во 1977 година со мисија да ги промовира врвните достигнувања во уметноста, музиката и книжевноста.
